وزیر جنگلات سبودھ انیال نے محکمہ جنگلات کے افسران کے ساتھ جائزہ میٹنگ کی

۔ دہرادون، وزیر جنگلات سبودھ انیال نے اسمبلی دفتر میں محکمہ جنگلات کے افسران کے ساتھ جائزہ میٹنگ کی۔ وزیر موصوف نے کہا کہ تہری ریاست 1949 میں انضمام ایکٹ کے تحت ہندوستان کے ساتھ ضم ہوئی جس کی شرائط کی تعمیل ہماری ترجیح ہے۔ انہوں نے کہا کہ حال ہی میں پورے نریندر نگر شہر کو محکمہ جنگلات کی اراضی کے طور پر دکھایا گیا ہے جو انضمام ایکٹ کی دفعات کے خلاف ہے۔ وزیر جنگلات نے کہا کہ نریندر نگر میں تقریباً 323 ہیکٹر زمین بادشاہ اور مقامی لوگوں کے نام پر تھی، 1964 کی سیٹلمنٹ کو بھی محکمہ جنگلات نے قبول کیا ہے۔ انہوں نے کہا ہے کہ انضمام ایکٹ کے مطابق ٹہری مہاراج کی 222 ہیکٹر پرائیویٹ اراضی اور 101 ہیکٹر اراضی کی نشاندہی کی جائے اور اس کی ڈی مارکٹنگ کی جائے تاکہ محکمہ جنگلات کی اراضی کی صحیح نشاندہی کی جاسکے۔ وزیر موصوف نے کہا کہ حال ہی میں ریونیو اور جنگلاتی اراضی کی نشاندہی کے لیے چیف سکریٹری کی صدارت میں ایک کمیٹی تشکیل دی گئی ہے جو ریاست میں واقع اس طرح کی متنازعہ اراضی پر حالات کے مطابق فیصلے کر سکے گی۔ وزیر موصوف نے کہا کہ نریندر نگر کا شہری ہونے کے ناطے یہ میرا فرض ہے کہ ریونیو اراضی اور جنگلاتی اراضی کے درمیان تنازعہ کو ترجیحی بنیادوں پر حل کیا جائے جس کے لئے عہدیداروں کو 40 دن کے اندر اراضی کی نشاندہی کرنے کی ہدایت دی گئی ہے۔ اس موقع پر ضلع مجسٹریٹ، ٹہری میور ڈکشٹ، پی سی سی ایف ایچ او ایف، انوپ ملک اور دیگر محکمہ جاتی افسران موجود تھے۔